வங்காள தேச அணியின் முன்னணி இடது கை வேகப்பந்து வீச்சாளர் முஷ்டாபிஜூர் ரஹ்மான். இவர் ஐபிஎல் தொடரில் மும்பை இந்தியன்ஸ் அணிக்காக விளையாடி வந்தார். அப்போது வலது கால் பெருவிரல் பகுதியில் காயம் ஏற்பட்டது.
இந்த காயத்திற்கான சிகிச்சையை முஷ்டாபிஜூர் ரஹ்மான் மேற்கொண்டு வருகிறார். இந்நிலையில் நேற்று வெஸ்ட் இண்டீஸ் அணிக்கெதிராக விளையாட இருக்கும் இரண்டு போட்டிகள் கொண்ட டெஸ்ட் தொடருக்கான வங்காள தேச அணி அறிவிக்கப்பட்டது. இதில் முஷ்டாபிஜூர் ரஹ்மானுக்கு இடம் கிடைக்கவில்லை.
இந்த காயம் காரணமாக ஆப்கானிஸ்தானுக்கு எதிரான மூன்று போட்டிகள் கொண்ட டி20 தொடரில் விளையாடவில்லை. ‘‘ஏதாவது அதிசயம் நடந்தால் மட்டுமே இரண்டாவது டெஸ்டிற்கு முன் முஷ்டாபிஜூர் ரஹ்மான் குணமடைய முடியும். இதனால் அணியில் இருந்து நீக்கப்பட்டுள்ளார்’’ என்று அணியின் தலைமை தேர்வாளர் அபேடின் தெரிவித்துள்ளார்.
வெஸ்ட் இண்டீஸ்- வங்காள தேச அணிகளுக்கு இடையிலான முதல் டெஸ்ட் ஜூலை 4-ந்தேதி ஆண்டிகுவாவிலும், 2-வது டெஸ்ட் ஜூலை 12-ந்தேதி ஜமைக்காவிலும் தொடங்குகிறது.
மூன்று டி20 போட்டிகளிலும் மட்டுமே விளையாடியுள்ள வலது கை வேகப்பந்து வீச்சாளர் அபு ஜாயத் முதன்முறையாக டெஸ்ட் அணியில் இடம்பிடித்துள்ளார்.
